शांत हो श्रीगुरूदत्ता । मम चित्ता शमवी आता ॥ ध्रु. ॥
तू केवळ माताजनिता । सर्वथा तू हितकर्ता ।
तू आप्तस्वजन भ्राता । सर्वथा तूचि त्राता ॥
भयकर्ता तू भयहर्ता । दंडधर्ता तू परिपाता ।
तुजवाचुनि न दुजी वार्ता । तू आर्ता आश्रय दाता ॥ १ ॥
अपराधास्तव गुरूनाथा । जरि दंडा धरिसी यथार्था ।
तरी आम्ही गाउनि गाथा । तव चरणीं नमवू माथा ॥
तू तथापि दंडिसी देवा । कोणाचा मग करू धावा? ।
सोडविता दुसरा तेंव्हा । कोण दत्ता आम्हा त्राता? ॥ २ ॥
तू नटसा होउनि कोपी । दंडितांहि आम्ही पापी ।
पुनरपिही चुकत तथापि । आम्हांवरि नच संतापी ॥
गच्छतः स्खलनं क्वापि । असे मानुनि नच हो कोपी ।
निज कृपालेशा ओपी । आम्हांवरि तू भगवंता ॥ ३ ॥
तव पदरी असता ताता । आडमार्गी पाऊल पडतां ।
सांभाळुनि मार्गावरता । आणिता न दुजा त्राता ।।
निज बिरुदा आणुनि चित्ता । तू पतीतपावन दत्ता ।
वळे आता आम्हांवरता । करुणाघन तू गुरूदत्ता ॥ ४ ॥
सहकुटुंब सहपरिवार । दास आम्ही हे घरदार ।
तव पदीं अर्पू असार । संसाराहित हा भार ।
परिहारिसी करुणासिंधो । तू दीनानाथ सुबंधो ।
आम्हा अघलेश न बाधो । वासुदेवप्रार्थित दत्ता ॥ ५ ॥
सद्गुरू अनिरुद्ध बापू यांनी दिवसात कमीत कमी 3 वेळा श्रीदत्त करुणात्रिपदी पठण करण्यासाठी सुचवले आहे .
*7 अगस्ट 2025 रोजी पितृवचनात सद्गुरू श्री अनिरुद्ध बापूंनी दररोज म्हणायला आणि ऐकायला सांगितलेली " श्रीदत्त करुणात्रिपदी'*
ही माहिती Credits: Aniruddha Bapu Talks - The Dad and His Children : WhatsApp Channel या व्हाट्सएप चॅनेल वर प्रथम प्रसिद्ध झाली .
या चॅनेल ला subscribe करण्यासाठी येथे क्लीक करा .
No comments:
Post a Comment